Tre persona nga Gostivari janë arrestuar në fshatin Çegran, pasi gjatë kontrollit të një automjeti janë gjetur dhe sekuestruar lëndë në formë pluhuri të bardhë.
“Më 10.11.2026, në orën 23:40, në fshatin Çegran, punonjësit e policisë nga SPB Gostivar kanë arrestuar personat S.I. (52), A.M. (36) dhe Sh.O. (39), të gjithë nga Gostivari”, njofton Policia e Gostivarit.
Sipas njoftimit policor, gjatë kontrollit të një automjeti të tipit “Peugeot”, me targa të Gostivarit, të cilin e drejtonte S.I. dhe ku ndodheshin edhe dy personat e tjerë, është gjetur dhe konfiskuar një substancë pluhur me ngjyrë të bardhë.
“Pas dokumentimit të plotë të rastit do të pasojë parashtresa përkatëse”, bëhet e ditur në njoftimin e policisë.
Autoritetet nuk kanë dhënë detaje të tjera lidhur me natyrën e substancës së sekuestruar. Gostivari Sot
