Me rastin e Ditës Botërore të Diabetit, kryetari i Komunës së Gostivarit, Valbon Limani, ka përcjellë një mesazh sensibilizues, duke vënë në pah rëndësinë e kujdesit të përditshëm për shëndetin dhe identifikimit në kohë të kësaj sëmundjeje.
Kësaj radhe, Limani iu drejtua qytetarëve në dy cilësi: si drejtues i komunës dhe si mjek, duke rikujtuar se diabeti nuk është më një problem që prek vetëm moshat e shtyra, por po shfaqet gjithnjë e më shumë edhe te të rinjtë.
Sipas tij, lufta kundër kësaj sëmundjeje fillon shumë përpara shfaqjes së komplikimeve, përmes ndryshimit të zakoneve të përditshme dhe kontrolleve të rregullta shëndetësore.
Ushqyerja e shëndetshme, aktiviteti fizik dhe diagnostikimi i hershëm janë disa nga masat që Limani veçoi si thelbësore për parandalimin dhe menaxhimin e diabetit.
Përmes këtij mesazhi, kryetari i Gostivarit u bëri thirrje qytetarëve që të mos e neglizhojnë shëndetin dhe të tregojnë kujdes jo vetëm për veten, por edhe për familjarët e tyre.
Mesazhi i tij në këtë ditë ndërkombëtare rikthen në vëmendje një çështje të rëndësishme për shëndetin publik: parandalimi, informimi dhe kontrollet me kohë mund të bëjnë dallimin në cilësinë e jetës së njerëzve që jetojnë me diabet.
