Një rast i dhunës në familje është regjistruar në orët e para të mëngjesit në Gostivar, ku policia ka arrestuar një 39-vjeçar të dyshuar për sulm ndaj bashkëshortes së tij.
Sipas informacioneve nga policia, më 9 mars 2026 rreth orës 03:00, zyrtarët policorë nga OVR Gostivar kanë privuar nga liria personin me iniciale M.M. (39) nga Gostivari. Arrestimi erdhi pasi bashkëshortja e tij, gjithashtu 39 vjeçe, e kishte raportuar në polici se ishte sulmuar fizikisht nga ai në shtëpinë ku jetonin së bashku.
Pas ndërhyrjes së policisë, i dyshuari është ndaluar dhe ndaj tij do të ndërmerren procedurat e mëtejshme ligjore. Autoritetet bëjnë të ditur se pas dokumentimit të plotë të rastit do të parashtrohet kallëzim përkatës penal.
Policia apelon që rastet e dhunës në familje të raportohen menjëherë, në mënyrë që të parandalohet përshkallëzimi i tyre dhe të mbrohen viktimat.
