Një incident familjar është regjistruar në orët e para të mëngjesit në Gostivar, ku një 25-vjeçar është arrestuar nga policia pasi dyshohet se ka kërcënuar prindërit e tij me një mjet të mprehtë.
Sipas informacioneve nga Ministria e Punëve të Brendshme e Maqedonisë së Veriut, më 5 mars 2026 rreth orës 01:40, efektivët e policisë nga OVR Gostivar kanë privuar nga liria personin me inicialet P.B. (25) nga Gostivari.
Raportohet se i riu është sjellë në mënyrë agresive në shtëpinë familjare, ku ka dëmtuar orenditë dhe ka kërcënuar prindërit e tij duke përdorur një mjet të mprehtë.
Pas ndërhyrjes së policisë, ai është shoqëruar në stacion policor, ndërsa autoritetet kanë bërë të ditur se pas dokumentimit të plotë të rastit ndaj tij do të parashtrohet kallëzim përkatës.
Rasti po trajtohet nga organet kompetente dhe priten procedura të mëtejshme ligjore.
