Presidenti amerikan, Donald Trump, ka krahasuar veten me dy nga paraardhësit më të njohur në historinë e SHBA-së, duke deklaruar se vetëm presidentët me ndikim të madh bëhen objektiv i atentateve.
Gjatë një aktiviteti në Shtëpia e Bardhë, Trump përmendi Abraham Lincoln si një president të madh dhe John F. Kennedy si një president shumë të rëndësishëm, duke shtuar se figura të tilla historike janë bërë shënjestër për shkak të ndikimit të tyre.
Komentet e tij vijnë një ditë pasi një burrë i armatosur u qëllua dhe u vra nga autoritetet, pasi kishte hyrë në mënyrë të paligjshme në perimetrin e sigurt të rezidencës së presidentit në Florida. Në momentin e incidentit, Trump ndodhej në Uashington.
Ai rikujtoi gjithashtu se ishte shënjestruar në korrik 2024 gjatë një tubimi elektoral në Butler të Pensilvanisë. Muaj më vonë, një tjetër person u arrestua nën dyshimin për planifikim të një sulmi ndaj tij në një fushë golfi në Florida.
“Lexoni për të gjithë këta vrasës të çmendur, por ata sulmojnë vetëm presidentët me ndikim. Ata nuk sulmojnë presidentët pa ndikim”, deklaroi Trump. Ai shtoi me ironi se ndoshta duhet të ishte “pak më pak me pasoja”, duke bërë shaka për idenë e të qenit “një president normal për pak kohë”.
Trump ka deklaruar edhe më herët se beson se ndërhyrja hyjnore e shpëtoi gjatë incidentit në Butler dhe se Zoti kishte dorë edhe në fitoren e tij zgjedhore në vitin 2024.
Deklaratat e fundit pritet të nxisin reagime të ndryshme në skenën politike amerikane, ndërsa debati për sigurinë e liderëve dhe retorikën politike mbetet i ndezur.
