Kompania Microsoft ka nisur një modernizim të rëndësishëm të nën-sistemit të ruajtjes në Windows, i cili synon të shfrytëzojë më mirë potencialin e disqeve SSD NVMe. Deri tani, një nga kufizimet kryesore ka qenë fakti se Windows përdorte protokollin më të vjetër SCSI për komunikim me disqet NVMe, një teknologji e krijuar fillimisht për disqet tradicionale HDD.
Kjo qasje pengonte përdorimin e plotë të shpejtësive që ofrojnë SSD-të moderne të lidhura përmes PCI Express. Me ndryshimin e ri, Microsoft po sjell mbështetje origjinale për NVMe, pa kaluar më përmes SCSI, duke rritur ndjeshëm performancën dhe duke ulur ngarkesën mbi procesorin.
Sipas testimeve të brendshme të kompanisë, performanca e SSD-ve NVMe mund të rritet nga rreth 1,8 milionë deri në mbi 3 milionë IOPS, çka përkthehet në hapje më të shpejtë të aplikacioneve, transferim më efikas të të dhënave dhe reagim më të mirë të sistemit në përgjithësi.
Aktualisht, kjo teknologji është e disponueshme në Windows Server 2025, ku mund të aktivizohet përmes cilësimeve të avancuara të sistemit. Microsoft ka bërë të ditur se ky është vetëm hapi i parë dhe se përmirësime të ngjashme pritet të integrohen edhe në Windows 11 në versionet e ardhshme.
Përfitimet më të mëdha priten për përdoruesit e SSD-ve më të rinj PCIe 5.0, por përmirësime të dukshme do të ketë edhe për disqet PCIe 4.0 dhe 3.0, veçanërisht në skenarë kërkues si përpunimi i skedarëve të mëdhenj, virtualizimi dhe video-lojërat.
Kjo risi mund të shënojë një hap të rëndësishëm drejt një përvoje më të shpejtë dhe më efikase për përdoruesit e Windows. Gostivari Sot
