Editorial – FLAKA
Kanë qenë të shpeshta dhe të thelluara marrëdhëniet politike ndërmjet kryeministrit të Maqedonisë së Veriut, Hristijan Mickoski, dhe krerëve të opozitës shqiptare, Sali Berisha dhe Ilir Meta, shkruan Flaka – Maqedoni.
Gjatë Kongresit të fundit të Partive Popullore Evropiane (PPE), Mickoski zhvilloi një takim bilateral me kryetarin e Partisë Demokratike, Sali Berisha, të cilin e përgëzoi për fushatën dhe i shprehu mbështetje për një rezultat sa më të mirë në zgjedhjet e 11 majit. Madje, ai ofroi edhe ndihmë në formë ekspertize elektorale për PD-në.
Kujtojmë se edhe në gusht të vitit 2024, në Ohër, Ilir Meta, lideri i Partisë Liria dhe ish-president i Shqipërisë, u takua me Mickoskin dhe kabinetin e tij qeveritar. Meta e cilësoi VMRO-në si një “ekip të mrekullueshëm me karakter dhe vizion”, duke shprehur mbështetje të plotë për politikat dhe projektet ekonomike të qeverisë së re në Shkup.
Në të njëjtën kohë, edhe nga kampi opozitar shqiptar në Maqedoninë e Veriut janë parë afrime të qarta me PD-në. Kryetari i Lëvizjes Besa dhe një nga liderët e koalicionit opozitar VLEN, Bilall Kasami, vizitoi Tiranën pak ditë para zgjedhjeve, duke mbështetur publikisht kandidaten e PD-së në Tiranë, Jorida Tabakun.
Por, në kontrast të plotë me këto takime dhe mbështetje të hapura për opozitën shqiptare, pas fitores së Partisë Socialiste dhe Edi Ramës në zgjedhjet e 11 majit, Mickoski ka qëndruar në heshtje. Deri më tani nuk ka pasur asnjë reagim apo urim zyrtar për fitoren e Ramës.
Ndryshe ka vepruar lideri i LSDM-së, Venko Filipçe, i cili ka uruar Ramën për “fitoren bindëse” dhe ka shprehur bindjen se Shqipëria do të vazhdojë rrugën e saj progresive drejt integrimit evropian.
Kjo heshtje e Mickoskit interpretohet gjerësisht si zhgënjim politik dhe diplomatik, pas një angazhimi të dukshëm në mbështetje të opozitës në Shqipëri. Kujtojmë që Ilir Meta gjindet prapa grilave për shkak të dyshimeve për keqpërdorime e kriminalitet, kurse Sali Berisha po ndiqet nga SPAK për të njëjtat motive. Flaka Media
