Një tjetër emër nga Gostivari ngjitet në majat e sportit evropian. Kësaj radhe është Leona Fetai nga fshati Simnicë, e cila ka arritur të fitojë titullin e kampiones së Evropës në kikboks, duke dëshmuar talentin dhe forcën e saj në arenën ndërkombëtare.
Fetai ka triumfuar në disiplinën K1, në kategorinë deri në 65 kilogramë, në Kampionatin Evropian të organizuar nga World Thai Kickboxing Association (WIKA), ku ka zënë vendin e parë.
Përveç medaljes së artë, sportistja nga Simnica është nderuar edhe me trofeun dhe rripin e kampiones, duke vulosur një sukses të rëndësishëm në karrierën e saj sportive.
Lajmin për këtë arritje e ka bërë të ditur babai i saj përmes një publikimi në rrjetet sociale.
Ky triumf është më shumë se një sukses individual. Ai përfaqëson një moment krenarie për familjen Fetai, Simnicën dhe gjithë Gostivarin, duke dëshmuar se sportistët nga vendet tona mund të arrijnë majat e garave ndërkombëtare.
Leona Fetai tashmë mban titullin e kampiones së Evropës dhe emrin e Simnicës në majat e kikboksit evropian.
