Organizata Komunale e Kryqit të Kuq në Gostivar ka realizuar një aksion humanitar në kuadër të Javës kundër urisë, nën moton „Mendoni edhe për ne“, me qëllim mbështetjen e personave dhe familjeve që përballen me vështirësi sociale dhe ekonomike.
Gjatë këtij aktiviteti janë shpërndarë gjithsej 500 bukë, të siguruara si donacion nga kompania „Žito Luks“, e cila iu bashkua nismës humanitare për të ndihmuar familjet në nevojë.
Shpërndarja është realizuar përgjatë pesë ditëve, me nga 100 bukë në ditë, duke ofruar ndihmë konkrete për personat dhe familjet që përballen me vështirësi në sigurimin e nevojave themelore.
Përmes këtij aksioni, Kryqi i Kuq në Gostivar synon të tërheqë vëmendjen ndaj problemit të urisë dhe të promovojë solidaritetin me kategoritë më të cenueshme të shoqërisë.
Nisma vë në pah rëndësinë e bashkëpunimit ndërmjet organizatave humanitare dhe sektorit privat në mbështetjen e qytetarëve që kanë më shumë nevojë për ndihmë. GS
