Nga 1 korriku do të fillojë lëshimi i pasaportave me emrin e ri kushtetues

Nga 1 korriku i këtij viti do të fillojë lëshimi i dokumenteve të reja të udhëtimit  të shtetasve të vendit me emrin e ri kushtetues, parashikon mes tjerash Propozim ligji për ndryshim dhe plotësim të Ligjit për dokumente të udhëtimit të shtetasve të Republikës së Maqedonisë së Veriut, i cili kaloi sot në lexim të parë në seancën e Komisionit kuvendor për siste politik dhe marrëdhënie midis bashkësive.

Propozim-ligji në seancë kaloi pa debat dhe u dha për veprim të mëtejshëm.

Siç shpjegoi përfaqësuesja e Ministrisë së Punëve të Brendshme Vesna Dorevska, me ndryshimet dhe plotësimet e Ligjit kryhet harmonizim me dispozitat e Ligjit për përdorim të gjuhëve, si dhe harmonizim me Ligjin kushtetues për zbatimin e amendamenteve nga XXXIII deri XXXVI të Kushtetutës së Republikës së Maqedonisë.

Njëherësh, me miratimin e Ligjit për përdorim të gjuhëve, mes tjerash detyrimet të cilat dalin nga ai, u imponua edhe nevoja e harmonizimit të formularëve   të dokumenteve personale që i lëshon Ministria e Punëve të Brendshme. Për dokumentet e udhëtimit si dokument personal të qytetarëve, kryhet harmonizim në pjesën e mënyrës së shtypjes së formularëve për dokumentet e udhëtimit dhe mënyrën e vendosjes  së të dhënave në to, me qëllim të harmonizimit gjithëpërfshirës  të zgjidhjes ekzistuese ligjore me zgjidhje ligjore të paraparë në Ligjin për përdorim të gjuhëve, si dhe në pjesën e implementimit ligjor të gjuhëve të të gjitha bashkësive etnike në shtet,  ashtu edhe në definimin terminologjik të kategorive të ndryshme të qytetarëve të bashkësive etnike, në mënyrë që është përcaktuar në Ligjin për përdorim të gjuhëve.

Përveç asaj që është theksuar, është paraparë edhe harmonizim të Ligjit me Amendamentin  XXXIII të Kushtetutës së Republikës së Maqedonisë së Veriut, nga aspekti i afatit në zëvendësim të dokumenteve të udhëtimit ekzistuese të cilat e përmbajnë mbishkrimin “Republika e Maqedonisë” me dokumente të udhëtimit me emrin e ri kushtetues të shtetit, duke e respektuar afatin e paraparë në nenin 3 të Ligjit kushtetues për zbatimin e Amendamenteve  nga XXXIII deri XXXVI të Kushtetutës, gjegjësisht pesë vjet nga hyrja në fuqi të ndryshimeve kushtetuese.

Formularët e dokumenteve të udhëtimit dhe të vizave, theksohet, shtypen në gjuhën maqedonase dhe shkrimin e tij cirilik, me përkthim në gjuhën angleze dhe frënge dhe shkrimin e tyre. Të dhënat të cilat vendosën në dokumentin e udhëtimit shkruhen në gjuhën maqedonase dhe shkrimit të tij cirilik dhe në  shkrimin bazë latin, përveç shenjave ndërkombëtare (kodeve), që shkruhen në pajtim me standardet e përcaktuara ndërkombëtare.

“Formularët e dokumenteve të udhëtimit të qytetarëve të cilët flasin gjuhë zyrtare të ndryshme nga gjuha maqedonase që e flasin të paktën 20 për qind e qytetarëve të Republikës së Maqedonisë së Veriut, sipas detyrës zyrtare shtypen edhe të dhënat në to shkruhen edhe në gjuhën dhe shkrimin që e përdor qytetari. Formularët e dokumenteve të udhëtimit të qytetarëve të cilët flasin gjuhë të ndryshme nga gjuha maqedonase që e flasin më pak se 20 për qind e qytetarëve të Republikës së Maqedonisë së Veriut, me kërkesë të tyre, shtypen edhe në gjuhën dhe shkrimin që e përdor qytetari. Me kërkesë të tyre personale, të dhënat që vendosen në dokumentin e udhëtimit shkruhen edhe në gjuhën dhe shkrimin që e përdor qytetari. Gjithashtu, me kërkesë të tyre personale të dhënat për emrin personal që vendosin në dokumentin e udhëtimit shkruhen edhe në gjuhën dhe shkrimin që e përdor qytetari”, qëndron në kumtesë.

Propozim ligji përmban dispozitë kalimtare e cila parashikon se dokumentet e udhëtimit të cilat e përmbajnë mbishkrimin “Republika e Maqedonisë” të lëshuara deri në ditën e fillimit të zbatimit të këtij ligji, do të vlejnë deri në afatin e vlefshmërisë që është specifikuar  në dokumentin e udhëtimit, por jo më gjatë se 12 shkurti i vitit 2024. Ndryshimi i propozuar është në drejtim të harmonizimit të ligjit me afatin e paraparë në nenin 3 të Ligjit kushtetues për zbatimin e Amendamenteve nga XXXIII deri XXXVI të Kushtetutës së Republikës së Maqedonisë gjegjësisht pesë vjet nga hyrja në fuqi të ndryshimeve kushtetuese.  Ligji, sipas propozimit, duhet të hyjë në fuqi ditën e tetë nga dita e shpalljes në “Gazetën Zyrtare të Republikës së Maqedonisë së Veriut”, ndërsa do të fillojë të zbatohet nga 1 korriku i vitit 2021.