Sot në Slloveni një nga lajmet kryesore ka qenë ndarja e çmimeve në mjekësi. E fituese e çmimit kryesor respektivisht marrëse e titullit “Mjeku im – Mjeku 2020″ është gjinekologia nga Gostivari Dr. Hatije Ismaili, njofton Gostivari Sot
Media sllovene shkruan që Dr. Hatije Ismaili bindi pacientët me qasjen e saj personale dhe dëshirën e sinqertë për t’i ndihmuar ata, jo vetëm si mjeke por mbi të gjitha si një qenie njerëzore.
“Fituesit morën çmime jo vetëm për profesionalizmin, por edhe për zemrën, njerëzimin dhe respektin për pacientët. Çmimi kryesor Mjeku im iu dha gjinekologës Hatije Ismaili”, raporton SiolNET.
“Unë kurrë nuk kam pritur mirënjohje ose lavdërime të veçanta për punën time, por çmimi “Gjinekologu im” (Doktori im), do të thotë shumë për mua”, tranmeton deklaratën e saj, media Viva nga Sllovenia.
Kënaqësia e pacientëve, raporton Viva, është jashtëzakonisht e rëndësishme për të.
Hatije Ismaili, u lind në Gostivar ku edhe kreu shkollën fillore, në Sh.F. Ismail Qemali (Mosha Pijade – asokohe) dhe dy vitet e para të shkollës së mesme.
Më pas, u transferua në shkollën e mesme të mjekësisë në Mitrovicë ku kreu vitin e tretë, ndërsa të katërtin e kreu në shkollën e mesme të mjekësisë në Prishtinë.
Më pas ka vijuar studimet në Fakultetin e Mjekësisë në Rijekë të Kroacisë. Specializimin në fushën e gjinekologjisë e ka kryer në Ljubljanë të Sllovenisë.
Dr. Hatije Ismaili është doktoreshë e licensuar e mjeksisë, e specializuar në gjinekologji, me një eksperiencë të madhe dhe profesionale në fushën ofurogjinekologjisë.
Për momentin ajo punon në Spitalin e Përgjithshëm ”Novo Mesto”, në Sloveni, si doktoreshë në sektorin e Gjinekologjisë.
Deri më sot, ajo ka publikuar shumë artikuj në revista mjeksore të Slovenisë dhe është bashkëpunëtore e jona , gjithmonë e gatshme për t`iu ofruar përgjigjje për problemet tuaja. Gostivari Sot
