Java e ardhshme është vendimtare për energjinë elektrike dhe ekonominë

Javën e ardhshme duhet të dihet se nga do të blihet energjia elektrike për ekonominë, ndërsa për qytetarët dhe kompanitë e vogla që janë në tregun e rregulluar, siç sigurojnë autoritetet, furnizimi me energji elektrike është i sigurt. Qeveria thotë se sezoni i ngrohjes do të nisë në kohë.

Zëvendëskryeministri për Çështje Ekonomike, Fatmir Bytyqi, ka deklaruar dje se java e ardhshme është vendimtare kur duhet të dihet se ku do të sigurohet energjia elektrike për ekonominë.

“Ka sinjale pozitive. Javën e ardhshme do të kemi njohuri konkrete se çfarë mund t’i ofrojmë ekonomisë”, tha Bytyqi pas manifestimit kushtuar organizatave të shoqërisë civile dhe ndërmarrjeve sociale.

Çdo gjë që është nën çmimin e bursës, sipas Bytyqit, mund të konsiderohet një çmim i lirë.

“Kemi situata ku çmimet shkojnë deri në 1000 euro për megavat dhe nëse ofrohet një çmim prej 300 euro është vërtet i lirë sepse është më pak se një e treta e çmimit të energjisë elektrike. E di që kapacitetet e ekonomisë ndonjëherë nuk janë aq të gatshme për të paguar, por ne po mundohemi t’i sigurojmë ato me energji elektrike. Këto janë kohë mbijetese”, paralajmëroi zëvendëskryeministri.

Edhe ministri i Ekonomisë, Kreshnik Bekteshi, deklaroi të premten se është duke negociuar me të gjitha shtetet fqinje për të ofruar energji elektrike më të lirë për ekonominë, por sipas tij, pritjet e sektorit të biznesit janë maksimale.

“Kërkojnë subvencionim direkt nga shteti prej 20 milionë euro për dhjetë konsumatorët e parë në vend konsumi i të cilëve është rreth 80 mijë megavat në orë. Nëse i kemi parasysh çmimet e sotme dhe sa subvencionim kërkojnë, vetëm për këto dhjetë kompani shteti duhet të ndajë rreth 20 milionë euro”, tha Bekteshi të premten për ditarin e televizionit “Sitel”.

Kërkesa të tilla të ekonomisë, sipas Bekteshit, janë të palogjikshme sepse pikërisht ata 10 konsumatorët më të mëdhenj të energjisë elektrike kanë realizuar fitime të mëdha në vitet e kaluara.

Edhe Bekteshi siguron se nuk do të lidhet asnjë kontratë për blerjen e energjisë elektrike me çmime në bursë.

Për momentin janë duke negociuar me Bullgarinë për blerjen e energjisë elektrike, ndërsa të enjten ministri Bekteshi ka vizituar edhe Turqinë.

Po bëhen përpjekje në periudhën e dimrit në shkollat ​​fillore dhe të mesme që mësimi të mbahet me prezencë fizike pas kërkesave të disa komunave për të kaluar në mësimin onlajn për shkak të kostove të larta për ngrohjen e shkollave. Ndërsa Sindikata për Arsim, Shkencë dhe Kulturë ka kërkuar nga Qeveria dhe Bashkësia e Njësive të Vetëqeverisjes Lokale (BNJVL) që të gjejnë zgjidhje të pranueshme për tejkalimin apo zbutjen e krizës energjetike në shkolla.

Për amvisëritë dhe kompanitë e vogla që janë në tregun e rregulluar do të ketë energji elektrike deri në muajin mars.

“Kjo do të thotë që qytetarët dhe 70 mijë kompanitë që janë në tregun e rregulluar nuk duhet të kenë frikë për energjinë elektrike deri në mars të vitit të ardhshëm”, tha dje Bytyqi.

Edhe  kryeministri Dimitar Kovaçevski në një intervistë për “Zërin e Amerikës” thekson se janë duke u zhvilluar negociata intensive me vendet fqinje për të siguruar energji elektrike për ekonominë dhe sasi të mjaftueshme të lëndëve të para për kapacitetet e brendshme energjetike.

“Kemi rritur edhe prodhimin e energjisë elektrike në kapacitetet shtetërore REK Manastir, Oslomej dhe TEC Negotinë. Me këtë sigurojmë energji elektrike për qytetarët dhe konsumatorët e vegjël. Rreth 600,000 familje dhe 70,000 kompani të vogla marrin 80 për qind energji elektrike të subvencionuar – që do të thotë se nëse nuk do të ishte subvencionimi nga shteti, ata do të paguanin pesë herë më shumë fatura të energjisë. Ajo që po bëjmë aktualisht është që përmes kontratave direkte me vendet tjera të sigurojmë energji elektrike për ekonominë, gjegjësisht për konsumatorët e mëdhenj të tregut të liberalizuar, duke qenë se çmimet që janë aktualisht në bursat botërore të energjisë nuk janë të përshtatshme për ekonominë maqedonase, por nuk janë të përshtatshme për asnjë ekonomi tjetër në rajon dhe Evropë. Ne do të vazhdojmë në atë luftë për siguri energjetike”, thekson Kovaçevski në intervistë.

Autoritetet  sigurojnë se do të ketë edhe shpërndarje të energjisë termike. Zëvendëskryeministri Bytyqi është i bindur se BEG, një kompani të cilës i janë hequr licencat e punës, duhet të japë energji termike deri në përcaktimin e operatorit të ri ekonomik. Ai thotë se sipas ligjit BEG është i obliguar që të ketë rezerva të mjaftueshme të gazit natyror dhe lëndëve të tjera të para për të siguruar energji termike.

Për momentin, mbetet e hapur çështja e pronësisë së termocentraleve  Lindje dhe Perëndim, të cilat u blenë nga “Adora Engineering” më shumë se një vit më parë dhe që kërkon t’ia shesë EMV-së me të njëjtin çmim me të cilin janë blerë. Për kompaninë, opsioni “qira” është i papranueshëm nëse nuk ka qëllim të qartë për blerje dhe shitje të ngrohtoreve.

Zëvendëskryeministri Bytyqi vlerëson se qiraja është një mjet legjitim dhe thekson se proceset duhet të jenë në përputhje me ligjin.

“Këmbëngulja e njërës palë për ndryshimin e pronësisë është legjitime, por do të përmbyllet sipas ligjeve. Qiraja është një mjet legjitim përmes të cilit do të përdoren ngrohtoret Lindje dhe Perëndimor dhe do të jepet energji termike dhe ndërkohë ka një periudhë të mjaftueshme kohore për të respektuar të gjitha procedurat ligjore nëse duhet të bëhet blerja e pronësisë”, deklaroi dje Bytyqi.