Në disa pjesë të qytetit të Gostivarit, këto ditë janë shfaqur arkivole të lënë nëpër rrugë. Këto pamje trishtuese fillimisht u shfaqën te varrezat e reja në lagjen “Mallki”, dhe të njejtët arkivolë të nesërmen u gjetën në deponinë “Rusino”.
Kanë qenë shumë fotografi dhe video që kanë dëshmuar këto ditë për këtë fenomen të pazakontë në Gostivar, por asnjë institucion nuk di të shpjegojë se si këto arkivole janë gjendur nëpër vende të ndryshme të qytetit, kush i ka lënë dhe kush e ka obligim asgjësimin e tyre.
Vetëm sot policia ka dalë me një deklaratë të shkurtër me shkrim. Nga aty thonë se në vendngjarje kanë dërguar zyrtarët e tyre për inspektim, por nuk janë gjetur as arkivole e as materiale tjera të cilat përdoren për varrim.
“SPB – Tetovë tanimë ka siguruar fotografi dhe video-materiale lidhur me rastin dhe merr masa për gjetjen e njerëzve që i lanë arkivolet në ato vende dhe nëse për këtë ekzistojnë dyshime për kallzime penale”, thuhet në kumtesën me shkrim të SPB – Tetovë.
Për këto pamje të trishtueshme televizoni Globi informoi që para një jave. Në kronikën mbi arkivolin e gjetur rreth rrugës Çajlë – Çegran, nuk pati reagim institucional, edhepse në mbrëmje arkivoli ishte larguar nga vendi, por nga kush u larguar ende nuk dihet.
