Bombë në furrën e Misajllovskit! VMRO-DPMNE e akuzon LSDM-në, prej atje kërkojnë që Çulev ta hetojë rastin!

Gostivari Sot
Nga Gostivari Sot 21 Qershor, 2020 20:56

Këtë mëngjes rreth orës 3 në furrën e cila është në pronësi të nënkryetarit të VMRO-DPMNE-së, Vllado Misajllovski e cila ndodhet në rrugën kryesore në Gjorçe Petrov është hedhur mjet shpërthyes. Misajllovski për këtë ngjarje njoftoi në profilin e tij në Facebook ku publikoi një video nga shitorja.

“Në shitoren e vogël në rrugën kryesore në Gjorçe Petrov ku familja ime punon me dekada të tëra është hedhur mjet shpërthyes dhe është shkaktuar dëm material. Falë Zotit se nuk ka viktima e as të lënduar. Nuk do të hyj në detaje, çfarë dhe si, kush dhe cili është mesazhi. Mesazhi që ma dërgojnë mua në prag të fushatës, shkruhet vetë”, deklaroi Misajllovski.

Nga MPB-ja përmes kumtesës njoftojnë se ngjarja ka ndodhur në orën 3:40 kur është denoncuar se del tym nga furra ndërsa paraprakisht është dëgjuar shpërthim.

“Pas ardhjes së nëpunësve policorë në vendngjarjen është vërejtur se dera e hyrjes është hequr tërësisht dhe është shkaktuar dëm material, andaj ekziston dyshim të arsyetuar se bëhet fjalë për vendosje të mjetit shpërthyes. Nuk ka persona të lënduar. Punohet për zbardhje të rastit”, thonw nga MPB.

Lideri i VMRO-DPMNE-së, Hristian Mickoski aludoi se kryerësi i kësaj vepre është LSDM duke thënë se nuk bëhet fjalë për ngjarje të rastësishme, por për qëllim të qartë.

“E shfrytëzoj rastin këtu në Kumanovë ta dënoj këtë akt dhe t’u porosis se nuk kemi frikë, përkundrazi, nëse ky është qëllimi i këtyre kriminelëve, nën dirigjim të qendrës së fuqisë, e orkestruar dhe e inskenuar nga pushteti, nuk kemi frikë, përkundrazi, kjo na motivon bile edhe më shumë”, deklaroi Mickoski.

Nga LSDM e dënuan ngjarjen dhe e thirrën ministrin e brendshëm Naqe Çulev ta zbardhë rastin dhe ta gjejë kryerësin, njëkohësisht i hodhën poshtë akuzat e Mickoskit.

“Bëhet fjalë për një praktikë të VMRO-DPMNE-së, të kryetarit të partisë i cili seriozisht e akuzon LSDM-në se qëndron prapa ngjarjes së këtillë. Do të them edhe një herë se bëhet fjalë për lajme të rrejshme dhe e thërras Mickoskin të tregojë prej ku e ka këtë informacion”, tha Kostadin Kostadinov nga LSDM.

Vllado Misajllovski është nënkryetar i VMRO-DPMNE-së dhe bartës i listës së kandidatëve në NJZ 2.

Gostivari Sot
Nga Gostivari Sot 21 Qershor, 2020 20:56