Basha publikon librin e tij “Misioni im”

Në krah të shkrimtares dhe botueses Flurutura Açka, të cilën e ka përzgjedhur si kandidate për deputete në qarkun e  Elbasanit, Lulzim Basha bëri publik librin e tij të parë “Misioni im”. Zgjodhi ta prezantojë nga Qyteti Studenti, ku nisi edhe rrugëtimi i 22 Marsit, datë simbolike për demokratët.

Ky botim i kryedemokratit vjen në kulmin e fushatës elektorale si një ftesë e hapur që shqiptarët ta votojnë si kandidat për kryeministër. Pasioni për letërsinë tha se i ka nisur që në fëmijërinë e tij, por ngacmimi për të shkruajtur u shpreh se daton vite më parë, pas frymëzimit që ka pasur nga Francis Fukujama dhe Samuel Huntington.

“Misioni im” sjell qasjet personale mbi jetën politike në vend dhe zhvillimet e opozitarizmit nën drejtimin e Lulzim Bashës, lidhjet familjare e personale dhe historikun e përfshirjes në politikën aktive, mënyrën për daljen nga kriza ekonomike, si dhe lidhjet familjare e personale me Kosovën.

Kjo nuk është hera e parë që një politikan boton një libër. Në 2011 Edi Rama nxori në treg librin e tij Kurbani, pak muaj pas humbjes në zgjedhjet për Bashkinë e Tiranës. Por ndryshe nga “Kurbani” i Ramës që ishte një rrëfim, misioni i Lulzim Bashës është një ftesë e hapur, që duket si një strategji e marketingut politik nga stafi i tij në kulmin e fushatës elektorale.