Qindra banorë janë evakuuar në qytetin sicilian të Nissemi pas një rrëshqitjeje toke prej katër kilometrash, pas reshjeve të rrëmbyeshme që kanë goditur zonën ditët e fundit, raportoi Guardian.
Fotot dhe videot tregojnë shembjen e një seksioni të ngushtë vertikal të shkëmbit, që ka shkaktuar dëmtime të mëtejshme në ndërtesat që ndodheshin pranë. Fatmirësisht, nuk ka raportime për viktima apo të lënduar deri tani.
Kryebashkiaku i Nissem, Massimiliano Conti, e përshkroi situatën si “kritike” dhe paralajmëroi se rrëshqitjet e tokës mund të vazhdojnë. Autoritetet lokale po punojnë ngushtë me policinë, zjarrfikësit dhe njësitë e mbrojtjes civile për të vlerësuar masat e mëtejshme, duke përfshirë rifillimin e mësimit, i cili u anulua përkohësisht.
Njësia e mbrojtjes civile e Italisë njoftoi se të gjithë banorët brenda një rrezeje katër kilometrash nga rrëshqitja e dheut janë evakuuar, ndërsa 70 vullnetarë po ndihmojnë në operacionet e shpëtimit. Strehimore emergjente janë ngritur, dhe qindra shtretër kampingu janë vendosur në sallën sportive Pio La Torre në Nissemi.
Kjo ngjarje vjen pas stuhisë Hari, e cila javën e kaluar përmbyti zonat bregdetare të Siçilisë dhe shkaktoi dëme serioze në rrugë dhe ndërtesa. Presidenti i rajonit, Renato Schifani, vlerësoi dëmin në rreth 740 milionë euro.
Në Katania, qyteti i dytë më i madh i Siçilisë, valët e fuqishme shkaktuan dëme në një restorant luksoz me ushqime deti, ndërsa video të shpërndara në mediat sociale treguan rrugët e përmbytura, mbeturinat që lundronin dhe qytetarët që përpiqeshin të shpëtonin pronat e tyre.
Autoritetet paralajmërojnë se moti ekstrem dhe rreziku nga rrëshqitjet e tjera mund të vazhdojnë, dhe qytetarët duhet të ndjekin me kujdes udhëzimet e emergjencës.
