14 mjekë të vdekur që nga fillimi i pandemisë

Viktimë e virusit korona sot u bë edhe mjeku Dashmir Dervishi nga Bogovina e Tetovës. 41 vjeçari nuk arriti t’u bëjë ballë komplikimeve shëndetësore të shkaktuara nga CoVid-19. Ky është mjeku i 14 i cili ndërroi jetë nga ky virus prej kur se filloi pandemia në Maqedoni të Veriut.

Të dhënat e Institutit të Shëndetit Publik vënë në dukje se Dervishi është mjeku i 4 nga rajoni i Tetovës, ndërkaq nga Shkupi kanë vdekur 3 mjek, dy të tjerë nga Kumanova. Nga qytetet tjera si Shtipi, Struga, Ohri, Gjevgjelia e Kavadari ndërruan jetë nga një mjek, të cilët u infektua në vijën e parë të frontit ndaj pandemisë.

Të dhënat e Ministrisë së Shëndetësisë tregojnë se aktualisht mbi 250 mjekë evidentohen si raste aktive. Që nga fillimi i pandemisë, 1,527 mantel bardhë janë diagnostikuar pozitiv, prej tyre 1268 janë shëruar.